الاستخدام الامثل ل linkedin (الجزء الاول)

ازيكم يا بشمهندين و يا بشمهندسات و نتمنى تكونوا بخير ⚘

من منطلق الحكمة الصينية اللي بتقول لا تعطني سمكة و لكن علمني الصيد فأحنا قولنا نعلمكم الصيد و نجبلكوا السمك و ندلعكوا على الاخر 😂😂

البوست ده بخصوص  موقع لينكيد ان او linkedin و البوست ده جزء من تلات بوستات هنكلمكم فيها عن لينكيد ان  و ازاي هو اهم وسيلة ليك للشغل لو كنت مش شغال او كنت بتدور على شغل جديد






الجزء الاول هيبقى عن اهمية لينكيد ان و شكل البروفايل بتاعك عليه
و تاني جزء هيبقى عن الاستخدام العادي للينكيد ان
و تالت جزء و ده الاهم استخدام ال search bar
و ربنا يوفقنا و نقدر نفيدكم و يوفقكم و تشتغلوا بقى 😂😂

قبل ما نتكلم في اي حاجة لازم الانجليزي بتاعنا يتحسن عشان اغلب الاعلانات فيه انجليزي و عامة يعني الانجليزي مهم جدا لينا كمهندسين   حاليا و مديرين و رواد اعمال و اصحاب مكاتب و شركات مستقبلا ان شاء الله😄


الجزء الاول؛
هنفترض ان في ناس متعرفش يعني ايه لينكيد ان اصلا فهنبتدي من البداية.
ايه هو linkedin ؟
ده موقع تواصل اجتماعي زي فيسبوك بس professional البوستات عليه بدل ما هي كوميكس و كورة و ضحك و هزار بتبقى اعلانات شغل و نصايح من ال hr و نصايح لحياتك العملية (للاسف العرب قلبوه فيسبوك 😂)
و البروفايل بتاعك فيه بيقى شبه ال CV و ممكن تقدم بالبروفايل بتاعك في اعلانات بتنزل عليه
ده الموقع www.linkedin.com
و ده لينك الابليكشن للاندرويد https://play.google.com/store/apps/details?id=com.linkedin.android
.............................................................................................

ايه اهمية linkedin؟
*كل ال hr بتوع الشركات المالتي ناشيونال ليهم اكونت عليه و بينزلوا اعلاناتهم عليه و التقديم بيبقى بال cv
* كل الشركات المالتي ناشيونال ليها صفحات عليه و بينزلوا اعلاناتهم عليه و التقديم بيبقى بالبروفايل نفسه
*كل الشركات الصغيرة بتعمل زي الشركات الكبيرة و عملوا حسابات عليه و برضو اعلانتهم عليه
*فيه فرص سفر كتير لو حد بيعرف يدور
*معظم الاعلانات اللي بتنزل عندنا و عند اي حد بينشر اعلانات مصدرها لينكيد ان
*لما تشوف الاعلان على صفحة hr الشركة انت ضامن انه مش اعلان مضروب غير لما تشوفه عندنا او عند اي حد
.............................................................................................

ازاي ابتدي في لينكيد ان؟ ( افتح الشرح بالصور )
-اول حاجة تعمل ايميل بروفيشنال لو معندكش ايميل يكون بإسم بروفيشنال و ميكونش فيه اسامي دلع و كمثال يعني يكون eng.sayed@gmail.com
ميكونش elmohandz.sika@gmail.com عشان بتفرق والله 😄
خلي الايميل البروفيشنال ده هو ايميل ال CV و هو ايميل linkedin

-هتنزل الابلكيشن و هتعمل اكونت عادي كأنه فيسبوك بس بإيميل و خليه يبقى الايميل البروفيشنال بتاعك

-هتمشي مع الخطوات و تعمل الاكونت و تحط صورة بروفيشنال ليك مش بخلفية بيضا بس تكون صورة كويسة من غير ضحك اوفر او بوز  او ورد او عيون فار و ودان قطة 🙂

-هتملى البروفايل كانه cv بس الفرق ان ده اسهل لان فيه قسم Education و current position و skills  و experience كل اللي عليك انك هتدخل على كل قسم منهم تملاه من غير افورة و حاطين صور بالتفاصيل دي عشان لو حد مش عارف يعمله و لو حد عنده مشكلة يبعتلنا على رسايل الصفحة هنساعده

-هتعمل follow لصفحات الشركات الكبيرة المتخصصة في مجالك سواء مصرية او في اي دولة عايز تسافرلها

-هتعمل Connect لناس معينة من اللي بيقترحهم عليك الموقع و كل ما زاد عدد ال connection عندك هتشوف اعلانات و فرص اكتر
و اهم من عدد ال connection المسمى الوظيفي بتاعهم
مش هيفيدك حاجة لو ضفت مثلا دكاترة امراض نفسية في الهند 😃
العدد مهم و المسمى الوظيفي اهم
حاول يبقى ال connection عندك ميقلوش عن ٥٠٠٠ و متقسمين بالطريقة دي

٢٥%يكونوا hr الشركات الكبيرة و الصغيرة المتخصصة في مجالك
٥٠% ناس ليهم نفس المسمى الوظيفي بتاعك
٢٥% ناس تخصصها قريب من مجالك او متداخل معاه و hr الشركات القريبة من مجالك او متداخلة معاه

بالطريقة دي ال feed عندك هيبقى فيها اعلانات جديدة كل يوم
و كل بوست تلاقيه ملوش لازمة هتعملوا hide و كل connection بتنزل بوستات ملهاش لازمة شبه بوستات الفيسبوك حاول تشيله من عندك عشان يفضل عندك ال news feed مليان اعلانات و بوستات مهمة على طول

.............................................................................................


يجي واحد يسألني ايه اهمية الشكل اوي كده 😏؟
اقوله احنا بلد مظاهر كدابة والله العظيم و بنحب نقلد برة في اي حاجة 😃
 و مطلوب مننا نتهم بالمظاهر عشان لما تبعت اضافة لاي hr في شركة كبيرة يحس ان ده بروفايل شخص بروفيشنال في يضيفك عشان لو في يوم احتاجك بعد كده
و نقطة تانية للناس اللي بتدور على سفر برة الاهتمام بالمظاهر دي اكتر من عندنا لازم كل حاجة تبقى بروفيشنال و ماشية على الايتيكيت

ارجع افكركم تاني لازم انجليزي يبقى كويس متضحكوش ال hr علينا 😂😂

ده اول جزء للناس اللي متعرفش لينكيد ان او يعرفوه بس مش كويس
و دي صور لشرح الاشتراك في الموقع

هتدوس فوق عشان تجيب البروفايل بتاعك و تعرف تعدله

دي اهم نقطة في التعديل هتدوس على career interests
اول خطوة هتخليها on بدل  off
ال status هتخليها actively applying
ال start date هتخليها as soon as possible
ال job titels هتدخل كل المسميات الوظيفية اللي تنفع في شغلك
و ال location طبعا مكان الشغل عشان ميجبلكش اماكن بعيدة
و هتختار نوع الشغل full time او خسب رغبتك
و هتدخل ال industry حسب مجالك

في ال contact
هتدخل رقم موبايلك و عنوانك و لو عندك skype اكتب الاكونت بتاعه و من ال privacy تقدر تتحكم في مين يقدر يشوف المعلومات دي
)هتحتاج الانجليزي بتاعك يبقى كويس برضو 😄)

هتحط صورة بروفيشنال زي ما قولنا
و ال summary مهمة لانها ظاهرة اول حاجة مع اسمك لما حد يدخل البروفايل بتاعك
لو مش شغال اكتب (مثلا) seeking for an opportuinty to work as site engineer او اي جملة  تعبر عن انت داخل الموقع ليه
لو شغال بس بتدور على شغل جديد هتخليها seeking for a new opportuinty  و تكمل
على فكرة بتفرق والله احنا بلد مناظر 😂😂
******الانجليزي مهم

هتضيف ال experince لو اشتغلت قبل كده و هتضيف ال education
  و لو عملت عمل تطوعي قبل كده زي رسالة مثلا او اتحاد طلبة او نشاط طلابي اكتب تفاصيله في volunteer experince

هتدخل مهاراتك الشخصية في skills هيبقى في searchbar هتكتب فيه مثلا autocad هتتطلعلك نتيجة بحثك autocad هتختارها
و هتزود كل حاجة بتعرفها في ال skills  عشان اي حد بيدخل البروفايل عندك بتبقى باينة ليه كانه cv

دي مش مهمة اوي بس زودها برضو مش هتخسر حاجة
هتلاقي فيها certifications لو واخد شهادة معتمدة زي ال pmp مثلا هتزودها
هتلاقي courses هتضيف فيها الكورسات اللي خدتها و لو معتمدة هتدخل الموقع بتاع الشركة اللي اخدت منها الكورس
هتلاقي فيها projects
هتدخل فيها مشروع تخرجك و اي مشروع عملته من ساعة ما اتخرجت كانه portfolio
و في languages تدخل فيها اللغات اللي تعرفها 😄